Saturday, April 27, 2013

"သူ မသိအောင်ရေးတဲ့ ရည်းစားစာ"


ရှင်းသန့်နေတဲ့ လမင်းကြီးထဲက
သန္တာကျောက်တန်းလေးမှာ
ရီ(ရယ်)သံလေးတွေ စွတ်လို့ ...
ရွှန်းလဲ့နေတဲ့ ကြယ်လေး နှစ်လုံးမှာ
ကြည်နူးရိပ်တွေ ရှိနေတယ် ...။

ဘယ်လိုပဲ အဓိပ္ပါယ်ဖွင့်ဖွင့်ပေါ့
အိပ်မက်တွေက လှပါတယ် ...။
(သူကလည်း လှတယ်)

ဆံနွယ်စတွေ
လေယူရာ သိမ်းတာလည်း မြင်ဖူးပါရဲ့
ကလစ်လေးနဲ့ အထိန်းမှာတော့
ရင်မှာ ခပ်ရှိန်းရှိန်းဖြစ်တယ် ...။

တဖက်သက်ပဲ စိမ်းလန်းနေဆဲပါ
ဘယ်နေ့ (သူ) ရောက်လာမလဲပေါ့ ...။

ရိုးသားခြင်းကိုတောင် အုတ်မြစ်ချခဲ့ပြီပဲ
တစ်နေ့မှာတော့ ...
မေတ္တာတရားကို သူ့ရှေ့မှာ
မျက်ဝါးထင်အောင် ချပြမယ် ...။

ညလင်းအိမ်

Sunday, March 17, 2013

ဝေး


ပျိုးခဲ့တာပါပဲကွယ်
ပန်းမှ မပွင့်လန်းတော့တာ
ဥယျာဉ်ဆိုတာလည်း ရူးချင်စရာပါပဲ
တစိမ့်စိမ့်ကြည့်နေရင်းက
ဝေးဝေးသွားတယ် ...။

အသံသာ  ကြားတယ်
ရုပ်မမြင်ရဘူး ...
စာသာ များတယ်
စကား မပြောဖြစ်ဘူး ...
တွေ့ဆုံခွင့်ဆိုတာ
ဝေးနေခွင့်မှ မဟုတ်တာ
ဒီလိုနဲ့ ...
ကျွန်တော်တို့ ဝေးခဲ့ကြပြီ ...။

မိုးတိမ်တွေ တောင်
အရောင်ပြောင်းတတ်တယ်တဲ့
ကျွန်တော့ တောအုပ်လေးမှာတော့
သစ်ပင်လေး အမြဲစိမ်းလန်းနေပါစေ ...။

ညလင်းအိမ် (၁၇.၃.၂၀၁၃)

Friday, March 1, 2013

ပြီးဆုံးသွားသော


မျက်လွှာ နှစ်ခု အပွင့်မှာ အိပ်ယာဝင်
မျက်လွှာ နှစ်ခု အပွင့်မှာပဲ အိပ်ယာထ
နံနက်ခင်းတိုင်းက ခြောက်သွေ့မှုနဲ့ ဖွင့်
ဒီလိုနဲ့ ကျွန်တော်ဟာ နေ့ နဲ့ နေ့ မှားသွားတယ် ...။

တရိပ်ရိပ် မူးဝေလာတဲ့ အာရုံမှာ
သတိရမိတာက သူ့မျက်နှာ
ကိုယ့်နဖူးကို ပြန်စမ်းတော့
တစ်ရာ့ တစ်ဆယ့်နှစ် ဒီဂရီက
ရိုးသားစွာ လက်မထောင်တယ် ...။

ကိုက်ခဲနေတဲ့ ထုံကျင်မှုကို ဂရုမစိုက်ပါဘူး
ကြည့်နေကြ အယ်လ်ဘမ်လေးမှာ
စကားတွေပြောဖြစ်တယ်
သတိရတယ် ... ချစ်သူ ...။

စ်ိတ်တွေက လွတ်လပ်စွာ ဖောက်ထွက်ကြ
ခန္ဓာကိုယ်ရဲ့ အတိမ်အနက်မှာ ပျော်ဝင်ကြ
ဒီလိုနဲ့ ချစ်သူကို တစိမ့်စိမ့် ထိုင်ကြည့်မိတယ် ...။

နှာခေါင်းဝက သွေးညှီနံ့ သဲ့သဲ့ရတယ်
ဆည်းလည်းသံ သဲ့သဲ့လည်း ကြားတယ်
ခေါ်သံတွေလည်း ပဲ့တင်ထပ်လို့ ...
....................................................
 အိပ်မက်တွေ ဖရိုဖရဲနဲ့
ကျွန်တော် အခု အပြင်းဖျားနေတယ် ...။


(ညလင်းအိမ်)

Monday, February 25, 2013

" ခွဲ "

"၁" နှစ်ခါ ထပ်သွားတဲ့ နေ့စွဲ
လမ်းခွဲပဲ (အဲ့ဒီနေ့) ပေါ့ ..
မခေါ်ပဲ အတင်းလာ
မနှင်ပဲလဲ ပြန်သင့်ပါပြီ ...
မြို့ ပြညတွေကိုတော့
လွမ်းနေရအုန်းမယ် ...။

အလုံးအရင်း တိုးဝင်လာကြတဲ့
တံခါးပေါက်တစ်ခုကို
ကိုယ်က အားမသုံးပဲ
ရအောင် ထွက်ခဲ့တယ် ...။

ပြောပြီး မလုပ်နိုင်သူတွေထဲ
ကျွန်တော် တိတ်တိတ်လေး လက်မထောင်ပါတယ်
သူရဲကောင်းအဖြစ် နဲ့ပေါ့ ...။

မင်း "ရူး" နေတာလားလို့
ပြောသူတိုင်းကို
ကျေးဇူးတင်ပါတယ်လေ ...
ကျွန်တော်ကိုယ်တိုင်က
ရုးသွပ်နေရတာ သဘောကျတယ် ...။

သစ်ရိပ်လေးတွေ မငိုပါနဲ့ ...
ကိုယ်က သင်းကွဲမဟုတ်ကြောင်း
မင်းတို့က သက်သေထူခဲ့ပြီးပြီ ...။

လမ်းကလေးကတော့ ဆွေးပေတော့ကွာ ...
ကိုယ် မလာနိုင်တော့တဲ့ နေရာမှာပဲ
မင်း ရှိနေပေးပါ
ကိုယ့် လိုလူတွေကို အားပေးပါဦး ..။

နှုတ်ဆက်တယ်ဆိုတာ
ပြန်မတွေ့တော့မယ့် သူတွေအတွက်ပါ
ကွန်တော်ကတော့ ကိုယ့်လက်ကိုယ်ဆွဲ
ခွဲထွက်ခဲ့ပြီ ...။

အမြစ်တွေ မတွယ်ချင်တော့ပါဘူး
လောကမှာ ကိုယ့်ရေသောက်မြစ်
ကိုယ်ဖြတ်လိုက်တဲ့ သစ်ပင်တစ်ပင်ဟာ
ခြသေ့င်္ကျွန်းမှာ ရာဇ၀င် အဖြစ်နဲ့ပေါ့ ...။

ညလင်းအိမ်
(၂၅.၂.၂၀၁၃)

Friday, August 24, 2012

"ဖြစ်စဉ်"

"ဖြစ်စဉ်"

ဒင်းဒေါင် ဒင်းဒေါင် ဒင်းဒေါင်
နှိုးစက်သံကစလို့ ကျွန်တော်တို့ နိုးထကြ
ပျင်းရိမှုတွေကို အိတ်ထဲထည့်
စက်ရုပ်လို သံပတ်နှုံးထားနှင့်
ခြေကျင် ကား ရထား အသီးသီး
ဦးတည်ရာ ထွက်ပေါက်များသို့ ...။

ရှေ့ကြည့် နောက်ကြည့်
သတိနဲ့သွား သတိနဲ့စား
Manager ကို အဖေတင်
Supervisor ကို ဦးချ
Boss ကိုရှောင်ရှား
မသင်ဖူးတော့ ရှောင်လင်ကွန်ဖူးများ
ကျွန်တော်တို့ အလိုလို တက်ကြဧ။် ...။

နာရီသံ တချက်ချက်မြည်သံများ
ရင်ခုန်သံ စည်းချက်အလား
၆ နာရီကို အမြန်ရောက်ပေးပါ
အိမ်ကို ပြန်ချင်လို့ပါ
(ရဲလေး သီချင်းမဟုတ်ပါ)
ခိုးကြောင်ခိုးဝှက် သိမ်းဆည်း
ရထား ကား ခြေကျင်
အလုအယက် တိုးဝှေ့ကြ
ထိုသို့ ထိုသို့ ...
ကျွန်တော်တို့ အိမ်ပြန်ကြဧ။် ...။

မကျေနပ်မှုတွေ တင်းမာမှုတွေ လျှော့ချ
မာနတွေ ခ၀ါချ
ဒယ်အိုးများ ဒန်အိုးများ အိုးခွက်ပန်းကန်များ
ချက်ကြပြုတ်ကြ
စားကြသောက်ကြ
ထိုသို့ ထိုသို့ ...
ကျွန်တော်တို့ ညဉ့်နက်ကြဧ။် ...။

တကယ်တော့
ငှက်တွေလိုပါပဲ
ကျလိ ကျလိနဲ့ အစာရှာထွက်
အချိန်တန်တော့ အသိုက်ပြန်ကြ
မိသားစုရဲ့ နွေးထွေးခွင့်ရကြ
သူတို့ဘ၀က ပိုလိုတောင် လှဧ။် ..။

ကျွန်တော်တို့ကတော့ ...
အပြင်ပန်းလှတဲ့ ခြင်္သေ့ကျွန်းအလှမှာ စီးမြော
စက်ရုပ်လိုသွား
စက်ရုပ်လိုစား
စက်ရုပ်လို စကားများ
ဌာနေပြန်ဖို့ အတွေးများ
စိတ်ကူးနဲ့မျှော်ရေး
ဝေးနေဆဲပါ ...။

(ခြင်္သေ့ကျွန်းမှ သူငယ်ချင်းများသို့)

ညလင်းအိမ်
၂၄.၈.၁၂

Thursday, August 2, 2012

"ကျွန်တော့ရဲ့ August"


လေညှင်းတချို့ရဲ့ အဖျားခတ်သံက
ပြက္ခဒိန် တစ်အုပ်ကို ဆုတ်ဖြဲသွားတယ်
ဘ၀ရဲ့ အသံတွေ ပီသလာတယ် ဆိုမလား
အနာဂတ်ကို မျှော်လင့်ချက်တွေနဲ့ ကြိုးညှိ
ကျွန်တော်လည်း ရင့်ကျက်ချင်ပြီ။

မိုင်တိုင်တွေ ဖြတ်ကျော်သွားတိုင်း
ကိုယ့်ရဲ့ အတ္ထုပ္ပတိက ကြီးလာတယ်
ရယူလိုမှုနောက် ပေးဆပ်မှုတွေ လိုက်ရင်း
အစရှာမရတဲ့ အဖြစ်အပျက်နဲ့
အိပ်မက်တွေ ပေါင်းစပ်ချင်လာတယ်။

ကျွန်တော်လည်း လူသားပဲလေ ...
အနာဂတ်ကို နှစ်ဆယ့်သုံး နှစ်ပိုင်းတစ်ပိုင်းဒီဂရီ စောင်းပြီး
ကြည့်ချင်ပါသေးတယ်။

တနေ့နေ့ပေါ့ ...
ကျွန်တော့်ရဲ့ သစ်ပင်လေး အရိပ်မှာ ခိုနားရင်း
သာယာလှတဲ့ August လေး ဖြစ်လာစေဖို့
ဒီနေ့ကို "Happy Birthday to Me" လို့
ဆုတောင်းပေးလိုက်တယ်။

ညလင်းအိမ်
(၂.၈.၁၂)

Saturday, March 17, 2012

"မိုးငွေ့ ... သို့ ... "


မိုးငွေ့တစ်စက်ရဲ့ ရာဇ၀င်တဲ့
ကောင်းကင်ကြီးက ဖွဲ့သီတယ်
သူ့ အကြောင်းက လှလို့
ငှက်ကလေးတွေတောင် တေးဆိုကြတယ် ...။

အဲ့ဒီနေ့ ...
မိန်ရာသီစက်ဝန်း အစွန်းမှာ
တောင်တန်းပြာက တရစ်
မိုးပြာထစ်ထစ်တွေ
ဆောင်အကုန်နွေအကူး
အလှစုံ အထူးတွေနှင့်
နှစ်သစ်ကို သယ်ယူလာကြတယ် ...။

အဲ့ဒီ အချိန် ...
အိမ်ဂျယ်လိုပါပဲ
တိမ်တွေထဲ ၀ဲ
နွေဦးကျဲကျဲမှာ
မိုးငွေ့ တစ်စက်က
အနာဂတ်ကို ဖွင့်လှစ်လိုက်တယ် ...။

အဲ့ဒီလိုနဲ့ ...
ဟိုး ... အရှေ့မှာ လေပြင်းတွေ
ပင်လယ်နဲ့ တောင်တန်းများ သက်သေတည်လို့
မိုးငွေ့ စီးဆင်းရာ လမ်းကြောင်း
ဖြောင့်ဖြူးခြင်း များစွာဖြင့်သာ ...။

ညလင်းအိမ်

ယနေ့၌ ကျရောက်သော မမီး မွေးနေ့သို့ ...    *.★*HaPpY BiRthDaY ANgEL*★ 。*

Friday, December 30, 2011

"ကမ္ဘာမြေ"


အပူလှိုင်းတွေနဲ့ ၂၀၁၁
လက်တစ်ဖက်က ဒုက္ခ
လက်တစ်ဖက်က သုခ
သူတို့လွန်ဆွဲပွဲမှာ ကျုပ်တို့နာတယ် ...။

အမှောင်နဲ့ အလင်းတစ်ချို့
ငြိမ်းချမ်းခြင်းရဖို့ တိုက်ခိုက်ကြတယ်
မိုးသောက်ခါနီးမက်တဲ့ အိမ်မက်က
ထင်ယောင်ထင်မှားဆိုတာ သူတို့မသိကြဘူး ...။

လေထုရဲ့ ညစ်ညမ်းမှုမှာ
အောက်ဆီဂျင်က လမ်းပျောက်တယ်
ညမှာ အမှောင်သောက်သူတွေ
ကိုယ့်လမ်းကိုယ်ဖောက်ရင်း
ကမ္ဘာကြီးက ပါးပါးလာတယ် ...။

ပြိုပျက်လာတဲ့ အုပ်ကျိုးချပ်တွေကြား
အသက်တွေ ပိတ်လှောင်ရတယ်
ငြိမ်းချမ်းခြင်းကို အယောင်ဆောင်ပြီး
အမှောင်ထုက လက်ဝါးကြီးအုပ်မှတော့
ရှုလိုက်မိတဲ့လေတိုင်းမှာ ရနံ့တွေ ရှားလာတယ် ...။

ရိုးသားခြင်းတွေက စရိုက်မဲ့
ကြီးနိုင်ငယ်ညှင်းဆိုတာ မင်းမူနေပြီ
လူစွမ်းကောင်းတွေ လက်မထောင်သတဲ့
အပြုံးအတုတွေရဲ့နောက်မှာ
မီးခိုးမြူတွေက ခန်းလုံးပြည့် ကောင်းချီးဖွင့်ကြတယ် ...။

ညရဲ့လမင်းက တခြမ်းပဲ့
လပြည့်ညဆိုတာ တိမ်ထုအယောင်ဆောင်
ဓာတ်အငွေ့တွေကြား
အပြေးအလွှားနဲ့တောင်
ကြည့်သူမဲ့နေတယ် ...။

ကလေးတစ်ချို့ ငိုသံ
မျက်ရည်ခသူတွေရဲ့
ဆာလောင်မွတ်သိပ်မှုတွေကြား
ရေလှိုင်းတွေက တဖုံ
လေပြင်းတွေက တမျိုး
မီးရောင်စုံတွေနဲ့ ဇာတ်ပျက်အောင် တိုက်ကြတယ် ...။

ပန်းတစ်ပွင့်ရဲ့လက်က
ဝတ်ဆံကျပျောက်သွားတဲ့ အနာဂတ်ထဲ
စာရင်းမသွင်းကြပါနဲ့တော့
အနောက်ဘက်မှာ အရှေ့မျှော်သူတွေ ဒုနဲ့ဒေး
အိမ်မက်တွေ တောင်လိုပုံနေရဲ့ ...။

ရောင်နီတစ်နှစ်တော့ ပွင့်ကောင်းပါတယ်
အေးချမ်းခြင်းတွေသယ်ဆောင်လို့
နှစ်သစ်မှာ ပွင့်လန်းပေးပါဦး ကမ္ဘာကြိး
ကိုယ် ထူ ကိုယ် ထ ပဲ ဆို ဆို
သူ ထူ ကိုယ် ထ ပဲ ဆို ဆို
အတိတ်ကို ချနင်း
အိပ်မက်ခြေရင်းမှာ
ကျုပ်တို့ လက်တွေနဲ့
ကမ္ဘာကြီး တည်တံ့နေအုန်းမှာပါ ...။

ညလင်းအိမ် (၃၀.၁၂.၂၀၁၁)

နှစ်သစ်အတွက် ရေးဖွဲ့ပါသည်။ ညီမလေး အေဒီ က ပါဝင်အားဖြည့်ပေးပါသည်။ နှစ်သစ်မှာ စိတ်ချမ်းသာမှု များဖြင့်သာ တွေ့ကြုံကြပါစေလို့ ဆန္ဒပြုရင်း  ....


လေးစားစွာဖြင့်